- Advertisement -

મુંબઈએ દિલ્હીને 29 રને હરાવીને અંતે જીતનું ખાતું ખોલાવ્યું

- Advertisement -

મુંબઈના રોમારિયો શેફર્ડે ધમાકેદાર બેટિંગનું પ્રદર્શન કરતા નોર્ત્જેની 20મી ઓવરમાં 32 રન સાથે 10 બોલમાં અણનમ 39 રન ફટકાર્યા બાદ બોલિંગમાં દિલ્હીના ઓપનર વોર્નરની વિકેટ ઝડપીને ઓલરાઉન્ડ દેખાવ કરતા મુંબઈનો આખરે દિલ્હી સામે 29 રને વિજય થયો હતો. આઈપીએલની સિઝનમાં ત્રણ પરાજય બાદ મુંબઈ ઈન્ડિયન્સ જીતનું ખાતું ખોલાવી શક્યું હતું. યજમાન ટીમને પ્રથમ બેટિંગનું નિમંત્રણ મળતા 20 ઓવરમાં પાંચ વિકેટે 234 રન ખડક્યા હતા.

- Advertisement -

રોહિત શર્મા (49) એક રનથી અડધી સદી ચૂક્યો હતો. ટીમ ડેવિડ (49*) અને શેફર્ડ (39*)એ છેલ્લી બે ઓવરમાં દિલ્હીના બોલર્સની જોરદાર ધોલાઈ કરતા 51 રન ઝૂડ્યા હતા જે દિલ્હીને ભારે પડ્યા હતા. દિલ્હીની ટીમે મુંબઈના 235 રનના ટારગેટના જવાબમાં 20 ઓવરમાં આઠ વિકેટે 205 રન નોંધાવ્યા હતા. પૃથ્વી શૉએ 40 બોલમાં 66 રન ફટકાર્યા હતા જેમાં આઠ ચોગ્ગા અને ત્રણ છગ્ગાનો સમાવેશ થયો હતો. અભિષેક પોરેસે 41 રનનું યોગદાન આપ્યું હતું. જ્યારે ટ્રિસ્ટન સ્ટબ્સે 25 બોલમાં ત્રણ ચોગ્ગા અને સાત છગ્ગા સાથે 71 રનની અણનમ ઈનિંગ્સ રમી હતી પરંતુ તે દિલ્હીને જીતાડી શક્યો નહતો. મુંબઈ તરફથી જેરાલ્ડ કોએત્ઝેએ સર્વાધિક ચાર વિકેટ ઝડપી હતી. બુમરાહે બે તથા રોમારિયો શેફર્ડે એક વિકેટ લીધી હતી. શેફર્ડને મેન ઓફ ધ મેચ જાહેર કરાયો હતો. દિલ્હીની ટીમમાં યુવા પ્રતિભાશાળી ખેલાડીઓ ખાસ સફળ રહ્યા હતા. કેપ્ટન રિશભ પંત (1) , અક્ષર પટેલ (8), લલિત યાદવ (3) અને કુમાર કુશાગ્ર (શૂન્ય) મિડલ ઓર્ડરમાં ફ્લોપ રહેતા ટીમ લક્ષ્‍યાંકનો પીછો કરવામાં નિષ્ફળ રહી હતી.

- Advertisement -

પૃથ્વી શૉ અને અભિષેક પોરેલે બીજી વિકેટ માટે 88 રનની ભાગીદારી નોંધાવી હતી પરંતુ સમયાંતરે દિલ્હી કેપિટલ્સે વિકેટ ગુમાવતા તેનો પરાજય થયો હતો. દિલ્હીના સુકાની રિશભ પંતે ટોસ જીતીને પ્રથમ બોલિંગ લીધી હતી. મુંબઈ ઈન્ડિયન્સ સળંગ ત્રણ મેચમાં પરાજય બાદ ભારે દબાણ હેઠળ હતું. ઓપનર રોહિત શર્માએ 27 બોલમા છ ચોગ્ગા અને ત્રણ છગ્ગાના સહારે 49 રન ફટકાર્યા હતા. ઈશાન કિશને તેનો સાથ આપ્યો હતો અને 23 બોલમાં 42 રન કર્યા હતા જેમાં ચાર ચોગ્ગા અને બે છગ્ગાનો સમાવેશ થયો હતો. બંને વચ્ચે પ્રથમ વિકેટની 80 રનની મજબૂત ભાગીદારી થઈ હતી. અક્ષર પટેલે બંને ઓપનર્સને પોતાના શિકાર બનાવ્યા હતા. ઈજામાંથી પુનરાગમન કરી રહેલા સૂર્યકુમાર યાદવ શૂન્ય રને પેવેલિયન પરત ફર્યો હતો. સુકાની હાર્દિક પંડ્યાએ સાતત્યપૂર્વક બેટિંગ કરતા 33 બોલમાં ત્રણ ચોગ્ગા અને એક છગ્ગાની મદદથી 39 રન કર્યા હતા. તિલક (6) ખાસ યોગદાન આપી શક્યો નહોત. ટીમ ડેવિડે ફટકાબાજી સાથે આક્રમક રમતનું પ્રદર્શન કર્યું હતું અને પાંચમી વિકેટ માટે હાર્દિક સાથે 60 રનની પાર્ટનરશિપ કરી હતી. હાર્દિક આઉટ થયો ત્યારે મુંબઈનો સ્કોર 181 રને પાંચ વિકેટ હતો. ત્યારબાદ મુંબઈની ટીમ 200નો આંક પાર કરશે તેવી શક્યા ઓછી જણાતી હતી. જો કે રોમારિયો શેફર્ડે એનરિચ નોર્તજેની અંતિમ ઓવરમાં બે ચોગ્ગા અને ચાર છગ્ગા સાથે 32 રન ફટકારીને ટીમ માટે મજબૂત સ્કોર ખડક્યો હતો.

- Advertisement -
- Advertisement -